Espainako Gobernuaren ildoari jarraiki, ETAri baldintzarik gabe desagertzeko eta desarmatzeko eskatzen jarraituko du Frantziako Gobernuak. Hala, ez du aintzat hartuko gaur Parisen burutu den bake konferentzian egin dioten engaiamendua. Europa Press berri agentziak Frantziako iturri diplomatikoak aipatuz zabaldu du berria.
Frantziako Asanbleako Victor Hugo aretoan egin duten konferentzia humanitarioan ez du parte hartu Frantziako Gobernuak.
Jorge Fernandez Diaz Espainiako Barne ministroarentzat, berriz, "zaharrak berri" dira gaur Parisen eginiko adierazpenak. "Gatazka politikoaz" hitz egitea ETAren eta ezker abertzalearen hizkera erabiltzea dela zehaztu du. ETAk baldintzarik gabe desegin behar duela gaineratu du.
