Nolanahi ere, Frantziskok zehaztu du "beste gai batzuk" daudela Eliza katolikoaren mahai gainean. Hala esan dio aita santuak Ansa Italiako berri agentziari, Israeldik bueltan.
Honela mintzatu da Frantzisko: "Zelibatua ez da fede dogma bat, bizitza arau bat da, nik asko maite dudana eta, nire ustez, Elizarentzat opari bat dena". Duela egun batzuk, apaizen bikotekide diren 26 emakumek gutun bat idatzi zioten Frantziskori, zelibatua berrazter dezala eskatzeko.
Zelibatua 1139. urteaz geroztik da derrigorrezkoa erritu latinoko Eliza katolikoan. Ekialdeko errituko Eliza katolikoan, ordea, ez da derrigorrezkoa ezkongabetza. Benedikto XVI.a aita santuak zelibatua berraztertzea baztertu zuen, "balio sakratua" delakoan.
