Gaddafi, Euskal Herriaren independentziaren alde

Muammar Gaddafi Libiako presidente izandakoak herrialdeko buruzagiei agindu zien Euskal Herriaren eta Andaluziaren independentziaren alde agertzeko, Espainiak Libiako gobernuaren aurkako NATOren misioa onartu ondoren, eta «mendeku» gisa. Hala jakinarazi du Al-Jazeera kateak, Gaddafiri egindako hainbat entzuketaren bidez erakutsi duenez.

Atzo arratsaldean eman zituen argitara entzuketa horiek Al-Jazeerak, eta jakinarazi du Gaddafiri eginiko beste entzuketa batzuk kaleratuko dituela datozen egunetan. Martxo hasierakoak dira entzuketa guztiak, NATOren bonbardaketak izan aurrekoak.Gaddafi iazko urriaren 20an atxilotu eta hil zuten haren gobernuaren aurka altxatu ziren erreboltariek. 1969tik, estatu kolpea eman zuenetik, izan zen Libiako presidente Gaddafi.