Hego Euskal Herrian lan egiten duten poliziek "arriskuagatik" jasotzen duten gainsaria eskatu zuen guardia zibilak Trebiñun lan egiteagatik, baina 2010ean ezezkoa eman zion Espainiako Polizia eta Guardia Zibilaren Zuzendaritzak. Ondorioz, Burgoseko Justizia Auzitegian (Espainia) helegite bat aurkeztu zuen, eta epaitegiak ebatzi du Trebiñu "administratiboki Burgosen mende badago ere" Arabako mugen barnean dagoela, "eta garrantzitsuena, bere kokapenagatik, Arabako gorabehera profesional berdinak" dituela.
Poliziaren Zuzendaritzak argudiatu zuen guardia zibil hori ez zutela Hego Euskal Herrira bidali, nahiz eta Trebiñun patruilatzen duen. Auzitegiak, ordea, uste du gainsari hori jasotzeko eskubidea ez dela soilik Hego Euskal Herrian dauden poliziena, eta "gune gatazkatsuetatik kanpo egon arren, horietan lan egiten dutenei" ere badagokiela.
1980ko abuztuaren 29an eginiko ministroen kontseiluan onartu zuten Araban, Bizkaian, Gipuzkoan eta Nafarroan dauden poliziei eta guardia zibilei gainsari bat ematea.
