Sareren arabera, hamar euskal preso daude larri gaixo. Haiei espetxealdi arindua ezartzea Espainiako legediak ez ezik, nazioarteko hainbat ituinek ere onartzen dutela ekarri dute gogora hango kideek. Legea betetzeko eskatuz Donostiako kaleak bete nahi dituzte urriaren 15ean.
Gaixo larri dauden presoak espetxean mantentzeak "gorroto eta mendeku logika" besterik ez dituela elikatzen uste du Sarek. Horregatik ohartarazi du jendeari ezinezkoa zaiola "benetako bake eta bizikidetza eskenatoki bateruntz urratsak egitea". Eskubide urraketen egoera konponbideagatik aldatu behar dela azpimarratu dute.
Bilera errondaz baikor
Alderdiekin bilerak egin dituzte Sareko kideek, eta baikor zein itxaropentsu daude haien jarrera ikusita. "Bilkurak egin diren tonua, irekitasuna eta gure irakurketarekiko sintonia mailak hori aditzera garamatza". Bilera horietatik atera duten ondorioa da, osatu berri den Eusko Legebiltzarreko 75 hautetsitatik 66 presoen inguruko ibilbide orri bat marrazteko esertzea posible dela.
Hala ere, badakite aurreneko bilera horiek fruituak emateko lanean jarraitu beharko dutela, eta halaxe egiteko asmoa dutela azpimarratu dute, "ilusioarekin, eta datozen bilkuretan urrats gehiago zehazten joateko uste onarekin".
