Gaizki egindako itzulpenak berriz ere

Guardia Zibilak eta Espainiako Poliziak askotan erabiltzen dituzte euskarazko txostenak. Hizkuntza ezagutu ez arren, txosten horien balorazioak egiten dituzte prestatzen dizkieten itzulpenetan oinarrituta. Ohikoa izaten da, ordea, itzulpen horiek gaizki egotea. Atzo ere agertu zen kasu bat. Guardia Zibilaren eta Espainiako Poliziaren arabera, Ibon Fernandez Iradiri ustez atzemandako zerrendetan agertzen zen Sonia Respaldiza Sorturen bultzatzaileetako baten izena, enkriptatutako eskuizkribuan haiek ulertutakoaren arabera. Diotenez, «ukitu gabe» jartzen du izenaren alboan, eta poliziek itzulitakoaren arabera «para tocar» esan nahi du, ez «sin tocar».