Atzo iluntzean galdu zen arrantzalea, Gorlizen. Etxera iristen ez zela ikusirik, haren familiak SOS Deiak larrialdi zerbitzura deitu du gaur 03:00etan, galdua zela adierazteko.
Goizean goiz bilaketa lanak abian jarri ditu Eusko Jaurlaritzako Larrialdi eta Meteorologiako Zuzendaritzako teknikari batek. Arrantzalearen bila joan dira Ertzaintza eta Itsasoko Salbamendua, helikopteroz eta itsasoz.
08:20an aurkitu du Ertzaintzak arrantzalea, helikopteroz. Jakinarazi dutenez, ez da erraza izan arrantzalearengana heltzea, Arrianaien jaitsieran baitzegoen. Helikopteroari esker harengana iristea lortu dute, eta Gurutzeta erietxera eraman dute kolpe eta akidura sintomekin.
