Eusko Legebiltzarrak Espainiako Gobernuari gaur eskatu dio Santa Maria de Garoñako (Burgos, Espainia) zentral nuklearra ixteko agindua ez baliogabetzeko. Legebiltzarreko talde guztiek, PPk eta UPDk izan ezik, sinatu dute testua; Aralarren, Ezker Anitzaren eta EAren ekimena izan da. Gobernuak agindua baliogabetzeko asmoa agertu zuen urtarrilean. Agindua baliogabetzen ez bada, 2013ko uztailaren 6an dago ezarrita Garoña ixteko data.
Agindua ez baliogatzeko eskariaz gain, Espainiako Gobernuari eskatu diote "zentral nuklearraren eraginpean dauden herrietara dinamizazio ekonomikoaren eta lan arloko neurrien planaren hobariak" zabaltzeko.
Espainiako Segurtasun Nuklearrerako Kontseiluak txosten bat prestatu zuen Garoñaren jarduera noiz arte luza zitekeen aztertzeko, eta 2019ra arte irekita jarrai zezakeela iradoki zion gobernuari.
Greenpeace talde ekologistak pasa den astean iragarri zuen alegazioak aurkeztuko dituela Garoña ixteko agindua baliogabetzearen aurka.
