Gaur goizeko zortzietan Garoñako (Burgos, Espainia) zentral nuklearra behin betiko ixteko eta eraisteko eskatzeko ekintza ikusgarria egin du Greenpeace talde ekologistak. Hainbat auto erabiliz egin dute protesta sinbolikoa.
Taldeak eskatu du ez emateko beste aukerarik zentrala berriro zabaltzeko. Eraiste plan bat exijitu du Greenpeacek, instalazioak geldirik ere "arriskuak" dituelako. Raquel Monton Greenpaceko bozeramaileak salatu du Garoña Europako Batasuneko zentral "zaharrena" dela eta erregai erradioaktiboa gordetzen duela. Edozein ezbeharrekin ondorioak "oso larriak" izan daitezkeela ohartarazi du.
Nuclenorrek Greenpeacen jokabidea "arduragabea" izan dela salatu du, halako ekintzek "pertsonen eta instalazioen segurtasuna arriskuan jartzen dutelako".
Frantzian, Belgikan, Suitzan eta Suedian ere zentral nuklearren aurkako protestak egin ditu gaur Greenpeace taldeak.
