Gipuzkoa Forum gogoeta eta eztabaidarako gunea aurkeztu dute gaur goizean, Donostian, Gipuzkoako Bazkundearen egoitzan. Irlandan baketzean eta berradiskidetzean eginiko bidea hartu dute hizpide ekitaldi horretan; Bakea eta berradiskidetzea. Irlandako eredua izenburupean ari dira solasean.
Forum horren lehen ekitaldia da gaurkoa, eta parte hartzaileen artean izan dira Joseba Egibar EAJko Gipuzko Buru Batzarreko presidentea, Harold Good IRAren desarme-prozesuan parte hartu zuen apaiz protestantea, Pat Colgan Europako Batasunaren Ipar Irlandako Bake eta Adiskidetze programaren arduraduna eta Andoni Ortuzar EAJko EBBko presidentea.
Irlandako ordezkariek ezinbestekotzat jo dute konponbidean gatazkarekin zerikusia izan duten alde guztiek parte hartzea, eta "pazientzia, konfiantza eta beste aldean dagoenarekiko errespetua" beharrezkoa dela aldarrikatu dute. Goodek esan du armagabetzeak ezin duela izan ezinbesteko baldintza elkarrizketa hasteko.
Colganek adierazi duenez, errespetatu egin behar da alde bakoitzak gertatutakoaz duen ikuspegia. Bizikidetzarako guneak sortzeko beharra ere azpimarratu dute.
Egibarren ustetan, Euskal Herriko bake prozesuaren "giltzetako bat" ETAk emandako pausoen "aldebakartasuna" da. Gaineratu du beharrezkoa dela "bizikidetzarako marko egoki bat" sortzea, eta Espainiako Gobernuari ohartarazi dio "erabakitze eskubidea errespetatzen ez den bitartean, gatazkak bizirik jarraituko" duela.
