Otsailaren 22an Sortuk Nazioarteko Konferentzia bat egingo du eta hurrengo egunean lehen kongresua. Bi ekimenak Iruñeko Baluarten egingo dituzte. Nazioarteko konferentziak "Egungo gatazken konponbidea" izenburua izango du ta bertan herrialde ezberdinetako gatazken konponbide prozesuez hitz egingo dute; Kurdistangoaz, Kolonbiakoaz, Palestinakoaz eta Saharakoaz, adibidez.
Herri eta auzo batzarretan hautatutako 450 ordezkari inguruk parte hartuko dute Sorturen lehenengo kongresuan, eta horiek izango dute botoa emateko aukera. Horrez gain, hainbat eragile politiko, sindikal eta sozialek parte hartuko dute, baita nazioarteko ordezkariek ere. Biltzarrean oinarri ideologikoak, ildo politikoa, eta antolakuntza eta funtzionamendua berretsiko dituztela jakinarazi du Sortuk. Horrez gain, Sorturen Kontseilu Nazionala aurkeztuko dute.
Billtzarraren egun berean ekitaldi politikoa egingo dute Iruñeko Anaitasunan, 17:30ean. "Sortuk herritarrekin batera egin nahi duelako bere sortze ekitaldia". Bertan tresna politiko gisa izango duen jarduna irudikatuko da, "Iraultza Demokratiko Nazionala" ardatz izango duena. "Ekitaldian parte hartuko dute, besteak beste, hainbat borroketan murgildurik dabiltzan milaka militantek, horiek izango direlako Sorturen jardunaren protagonistak".
