Gaur berriro 40 graduren bueltan

Atzo bezala, tenperatura altuak izango dira gaur ere; 40 gradutara iristeko zorian egon ziren atzo Nafarroa eta Arabako hainbat lekutan. 37 gradutara iritsi ziren Iruñean, Tuteran (Nafarroa), Gasteizen -irudian-, Laudion (Araba) Iurretan (Bizkaia) eta Alegian (Gipuzkoa), esaterako. Kostaldean 32 gradu inguruko tenperaturak izan ziren. Nafarroako Gobernuak ez du neurri berezirik hartu, baina Eusko Jaurlaritzak alerta horia eman zuen atzo, eta gaur arte luzatu du.

Oro har, beroarekin kontuz ibiltzeko eskatu dute agintariek, eta bero boladetarako ohiko aholkuak eman dituzte osasun arloko arduradunek: eguneko ordurik beroenetan itzalean egoteko, ura edateko, eta zahar eta haurrekin arreta bereziz ibiltzeko.