Frantziako Poliziak ostegunean atzeman zituen Nathalie Chasserieux eta haren bikotekidea, eta bien etxebizitza miatu zuen. Ostiralean, berriz, Enrique Lopez iheslari ohia atxilotu zuen Poliziak, Miarritzen bertan, haren bikotekidearekin batera. Igandean eraman zituzten Parisera Chasserieux eta Lopez, eta gaur igaroko dira epailearen aurretik; libre utzi dituzte, ordea, bien bikotekideak.
ETAren egitura tekniko-logistikoaren kontrako operazioa izan da, Espainiako Barne Ministerioak azaldu zuenez. 2014ko uztailaren 15ean, agiri bat plazaratu zuen ETAk, eta jakinarazi zuen jarduera armatua amaitu ostean bere egiturak moldatzeari ekin ziola eta "egitura tekniko-logistikoa" osatzen ari zela, erakundearen armategiak zigilatzeko lanak errazteko asmoz. Egitura horren kontra jo nahi izan du Frantziako Poliziak.
