Artea kalera atera eta salaketarako erabiltzeak egin du ezagun AEBetako Indecline artista anarkisten kolektiboa. Donald Trump AEBetako presidentegai errepublikanoaren eskultura biluziak egin dituzte kideek, eta AEBetako bost hiritako leku ezagunetan jarri.
Giza tamainako eskulturak dira: sabelalde lodia, ile horia, eta barrabilik ez dute. The Emperor Has No Balls(Enperadoreak ez du barrabilik) izena jarri diote ekintzari. New Yorken jarri dute horietako bat, Union Square plazan; baina erretiratu egin diete handik gutxira.
Ez da kolektiboak Trumpen aurkako arte ekintzak egiten dituen lehen aldia. Duela hilabete batzuk, Trumpen aurkako grafiti bat egin zuten Tijuanan (Mexiko), AEBen eta Mexikoren arteko mugan, hark migratzaile mexikarren kontrako adierazpenak egin ostean.
Kolektiboko kideek maiz egin dituzte auzi politiko eta sozialak salatzeko arte ekintzak: multinazionalak, Polizia, gobernua eta Trump bera dituzte jo puntuan. Hollywoodeko ospearen pasealekuan egin zuten azkenetakoa, orain dela hilabete gutxi. Poliziak hildako herritar beltzen izenak itsasi zituzten izenik ez duten izarretan; besteak beste, Freddie Grey eta Charlie Brown gazteen izenak. Black Lives Matter (Beltzen bizitzek axola dute) izena jarri zioten instalazioari. Haiena da inoiz egin den grafiti ilegalik handiena ere.
