Ertzaintzak 26 urteko gizonezko bat atzeman zuen atzo Bilbon, ustez bikotekide ohiari heriotza mehatxuak egiteagatik. Eusko Jaurlaritzako Segurtasun Sailak emandako datuen arabera, gizona biktimaren lantokian azaldu, eta irainka eta mehatxuka hasi zitzaion. Ertzainek, hara joan, eta atxilotu egin zuten.
Bikotekideari tratu txarrak ematea egotzita, berriz, beste gizonezko bat atxilotu zuten Barakaldon (Bizkaia). Herritar batek eman zien abisua ertzainei. Hark azaldu zienez, biktimari laguntzea lortu zuen, eta banketxe bateko kutxa automatikoaren gelan zeuden ezkutatuta. Atxilotuak 33 urte ditu. Emakumeak salatu zuen harremana eten nahi zuela esan ziola bikotekideari, eta orduan egin ziola eraso.
Bestalde, Ertzaintza Donostian izandako sexu eraso ahalegin bat ikertzen ari da. Igandean izan zen ustezko erasoa, Aldakonea kalean. Biktimaren bikotekideak aurre egin zion ustezko erasotzaileari, eta ihes egin zuen.
