Gerenabarrenak dio Imazen erabakiak ez duela Egibarren jarrera baldintzatu behar

Josu Jon Imazen EAJren Euzkadi Buru Batzarreko (EBB) lehendakaritzara ez aurkezteko erabakiak Joseba Egibarren jarrera ez duela baldintzatu behar uste du Iñaki Gerenabarrena EAJren Araba Buru Batzarreko presidenteak, gaur Euskadi Irratian esan duenez. "Imazek bere hausnarketa politikoa egin du, eta Joseba Egibarrek eta gainontzekook gurea egin behar dugu. Batzuek horiek lotuta egon beharko luketela ikustarazi nahi dute baina, nire ustez, ez daukate loturarik".

Jose Luis Bilbao Bizkaiko ahaldun nagusiaren ustez, berriz, Imazen erabakiaren ostean "kontsentsuko hautagai" bat izango dute EAJn EBBren presidentea hautatzeko. Abenduaren 1-2ko Batzar Nazionalean aukeratuko dute burua, eta aurten batzar hori "lasaiagoa" izango dela uste dio Bilbaok.

Imazek erabakia alderdiaren "batasuna eta barruko indarra" lortzeko hartu duela uste du Bizkaiko ahaldun nagusiak, eta hark "eskuzabal, koherentziz eta erantzukizunez" jokatu duela. "Nik ez diot agurrik esan, gero arte baizik, noiz itzuliko den ez dakidan arren".