Gernika ontzikoek Gazarako flotillaren misioa bukatzear egon daitekeela jakinarazi dute Greziatik. Zuzeneko emiso bidez egindako adierazpenetan baieztatu dute itsasoratzeko baimena izan bezain laster itzultzea ari direla aztertzen.
Edorta Jimenezek emandako babes guztia eskertu nahi izan du. Esan du borroka oso momentu politiko esanguratsura eramatea lortu dutela. Idazleak Espainiako Gerra Zibilean ematen zen blokeo egoerarekin parekatu du gertatzen ari dena. Gogoratu du, errepublikarren aldeko portuak blokeatu egiten zituztela laguntza humanitarioa ere iritsi ez zedin, eta horixe dela momentu hauetan Grezia egiten ari dena.
"Europar Batasunak, Europako demokrazia faltsuek eta bereziki Espainiar eta Greziar gobernuek Israelako gobernu sionistarekiko duten menpekotasuna" salatu dute. Hitza hartu duen kideetako batek gehitu du Espainiako Gobernua interes ekonomikoetara saldu dela.
Gazara iristea lortu gabe ere, gustura daude egindako lanarekin. Beraien esanetan, agerian geratu baita gobernuen benetako jarrera zein den. "Gobernuek herrien arteko elkartasuna eten nahi dute, baina hori eguzkia edo haizea gelditu nahi zatea bezala da"
Gazara iristea lortuko ez balute ere, aurrerapausoak egin direla nabarmendu dute. "Blokeoa apurtzen ari gara", errepikatu dute kamararen aurrean jarri diren kide guztiek. Geratutakoaren ondoren borroka aldatu egingo dela esan dute: "nazioarteko legalitatearen aurka egin behar dugu hemendik aurrera".
Free Palestine kamiseta berdeak soinean zeramatzatela egin dute zuzeneko emisioa Gernika ontziko kideek.
Elkartasuna adierazi eta mobilizatzeko deia luzatu dute Gernika ontzitik. Esan dute bi norabidetakoa dela salatu beharreko blokeoa, Gazak jasan behar duena, eta Gernika ontziari berari egindakoa.
