Gernikako Akordioaren arabera, "Espainiako eta Frantziako estatuek ETAren borroka armatua amaitu izan ez balitz bezala jokatzen dute, azken atxiloketek adierazten duten moduan", eta, ondorioz, uste du garai berri honi muzin egin eta eragileen eskaerei "entzungor" eginez segitzen dutela.
Atzo, esaterako, Jorge Fernandez Diez Espainiako Gobernuko Barne ministroak eta Manuel Valls Frantziakoak esan zuten ETA desegitea "ezinbesteko baldintza" dela ezer aldatzeko.
"Jokabide hori larria da, eta Euskal Herriko gizarte gehiengo zabalaren bake nahia behin eta berriz zapuzten du", salatu du Gernikako Akordioak gaur, prentsa ohar baten bidez. "Blokeo egoera gotortzen dituzten jokabideak behin betiko bertan behera uzteko eta elkarrizketaren bideari heltzeko deia egiten diegu bi estatuei. Elkarrizketa baita bake bide bakarra".
Xedea indarkeriarik gabeko egoera eta normalizazio politikoan aurrera egiteko ekarpenak egitea dela esan du eragile politiko, sindikal eta sozialen bilguneak, eta dio ETAk hori bete egin duela.
Oroitz Gurrutxaga eta Xabier Aranburu ustezko etakideen atxiloketak salatzeko elkarretaratzeak deitu ditu biharko, Atxiloketarik ez. Konponbide garaia da lelopean, Errenterian (20:00, Herriko plaza) eta Ondarroan (20:00, Alameda).
