Durango eta Iruñea batuko dituen giza katea osatzeko lau egun falta direla, gora jarraitzen du atxikimendu kopuruak. El Correo egunkariak gaur argitaratu duenez, Andoni Ortuzar EAJko presidenteak parte hartuko du erabakitzeko eskubidearen aldeko ekimenean.
Joseba Egibar EAJko Eusko Legebiltzarreko bozeramaileak ere parte hartuko du, lagunekin eta senideekin. Euskadi Irratian elkarrizketatu dute Egibar, eta Gure Esku Dago mugimendua eta erabakitzeko eskubidea izan ditu hizpide.
Aitortu du alderdiek ez zutela aurreikusi halako dinamika eratu izana, eta gaiaren inguruan EAJ eta Sortu mintzatu direla gaineratu du. Nolanahi ere, nabarmendu du EAJk ez duela kontsignarik eman iganderako, baina azaldu du alderdikide asko ari direla herriz herriko antolaketan parte hartzen.
Erabakitzeko eskubideaz, berriz, EH Bildurekin "gutxienekoak" adostearen alde azaldu da; horien artean aipatu ditu elkarrekiko errespetua izatea eta burujabetasuneranzko urratsak zehaztea. Izan ere, ohartarazi du ezker abertzaleak ez duela onartzen independentziarako bidean Euskal Autonomia Erkidegoak eta Nafarroak erritmo ezberdinak izatea, eta erantsi du horrek "atzeratu" egiten duela independentzia.
Markel Olanok Gipuzkoako Batzar Nagusietan egindako agerraldian baieztatu du giza katean egongo dela.
Ezker Anitza ez da katean izango
Ezker Anitzak eta Iratzarri-EKIk iragarri dute ez dutela parte hartuko igandeko giza katean, "nahasgarria" delakoan. Ohar batean, azaldu dute erabakitzeko eskubidearen aldekoak direla eta "demokrazia ariketa bat" dela, baina zehaztu dute ez daudela ados giza katearen ekimenarekin.
Azaldu dutenez, "hamarkadetan ezagututako krisi politiko, sozial, ekologiko eta ekonomiko handienaren erdian, EH Bilduk eta EAJren parte batek babestutako ekimen hau nahasgarria da". Horien ustez, herritarrek ez dute aukerarik izan erabakitzeko eskubidearen "etorkizuneko garapena" ezagutzeko: "zein baldintza zehatzetan proposatzen den erabakitzeko eskubidea". Zein lurralde den erabakitzeko eskubidearen subjektu ere ez du zehazten ekimenak, Ezker Anitzaren eta Iratzarri-EKIren ustez.
Podemos-Ahal Duguk parte hartzera deitu du
Podemos-Ahal Duguk, berriz, igandeko giza katean parte hartzeko deia egin die herritarrei: "Herriek bere etorkizuna erabakitzeko eskubidea ez da abertzaleen eskakizuna, eskakizun demokratikoa baizik, estatuburu mota erabakitzeko eskakizuna bezalakoa". Gaur egun, "bigarren trantsizioa eta prozesu konstituziogilea" beharrezko direla aldarrikatu dute, eta Gure Esku Dagorekin dituzten antzekotasunak nabarmendu: "Politika letra handiz, politika garbia egin nahi duten herritarrak direlako, eskubide demokratiko baten aldeko adostasuna bilatzen ari direnak". "Espero dugu igandekoa eskubide demokratikoaren aldeko mugimendu anitz, zeharkako eta herritarraren hasiera izatea".
