Getxoko (Bizkaia) Ereaga eta Arrigunaga hondartzek bandera urdina izango dute beste urtebetez. Azken urteetan bezala, Ingurumen Hezkuntza eta Kontsumitzaileen Elkarteak (ADEAC) izendatuen zerrendan sartu ditu bi hondartza horiek. Ingurumena errespetatuz, itsasertzaren eta hondartzen kudeaketan egindako ahalegina saritzen du elkarteak. Duela 27 urte hasi ziren saria ematen.
Bandera urdina ematerakoan zenbait irizpide hartzen dituzte kontuan. Besteak beste, uraren kalitate ona, garbitasuna, informazioa, segurtasuna, zerbitzuak eta instalakuntzak. Turismoaren garapen jasangarriari ere erreparatzen diote. Ikurrak jasotzeko, eskaera aurkeztu behar dute udalek. Ez dute jakinarazi Bizkaitik eta Gipuzkoatik zenbat eskaera jaso dituzten. Aurreko urteetan, esaterako, eskaera gutxi jaso izan dituzte.
Ipar Euskal Herriko hondartzei dagokionez, berriz, hurrengo astean emango dute bandera urdina izango duten hondartzen berri.
