Gipuzkoako hiri hondakinen arazoari aurrea hartzeko eta haiek kudeatzeko asmoz, aholku batzordea sortzea erabaki du gaur Foru Aldundiko Diputatuen Kontseiluak. Haren arabera, "oso osaera zabala" izango du batzordeak, "gizarte eragile askok" parte hartuko dutelako.
Egitekoak, besteak beste:
- "Hondakinen kudeaketa une oro lurraldearen benetako beharretara egokituta egon dadin, batzordeari analisia eta ebaluazioa egitea dagokio.
- Hondakinen kudeaketa orokorraren alorreko politikak aztertuko ditu, betiere udaletan hartutako erabakiak kontuan hartuta. Plangintza benetako egoerara egokitzen ote den aztertuko du.
- Arautegi aurreproiektuei, planei eta proiektuei proposamenak egitea.
- Hondakinen kudeaketari buruzko iritzia ematea.
- Planei eta programei buruzko aholkuak ematea.
- Garapen iraunkorrari buruzko neurriak proposatzea.
- Hezkuntzako neurriak proposatzea.
- Herritarren partaidetza sustatzea".
40 kide inguru egongo dira aholku batzordean, Foru Aldundiak dioenez. Haien artean: Ingurumen diputatua, Ingurumen foru zuzendaria, Batzar Nagusietako taldeen ordezkariak, arloko mankomunitateak, udalak, Jaurlaritza, sindikatuak, nekazariak, enpresak, merkatari eta ostalariak, unibertsitateak, ingurumen elkarteak...
