Aurrera doa Korrikaren 18. edizioa, eta hiru herrialde zeharkatu ditu gaur. Gauerdia igaro eta laster Trebiñura sartu da, eta eguerdirako Bizkaira iritsi, Otxandiotik.
Arratsaldean Bizkaiko hainbat herritan aritu dira lasterka: Durangon, Elorrion, Berrizen... 18:30 aldera sartu da Gipuzkoan berriro; Eibarren izan da, eta Soraluze eta Elgoibarretik barrena, Azkoitian amaituko dute eguna. Aurtengo Korrika Gipuzkoan hasi zen hain justu, martxoaren 14an, Andoainen.
Zazpigarren eguna du gaur Korrikak, eta jadanik kilometroen erdiak gainditu dituzte. Goizeko zortzietarako, guztira 1.373 kilometro eginak zituzten, eta 1.214 falta zituzten aurtengoa amaitzeko.
Igandean amaituko da 18. edizioa, Baionan. Lapurdiko hiriburuan irakurriko dute lekukoak zazpi herrialdeetan zehar eraman duen mezua.
