Bizkaiko ahaldun nagusi Unai Rementeriaren esanetan, azken urtean eskualdez eskualde izan dituen bileretan sarri eskatu diote gizarte zerbitzuetan kontrola handitzeko. "Bizkaia solidarioa da, eta aurrerantzean ere hala izan gura du, baina, aldi berean, erakundeek gizarte laguntzen kontrol handiagoa egitea nahi du". Horretarako, gizarte zerbitzu eta laguntzak ikuskatu eta kontrolatzeko 2017-2019 Plan Orokorra osatu dute. Goizean aurkeztu du, Isabel Sanchez Robles Gizarte Ekintza diputatuak eta Jose Maria Iruarrizaga Ogasun diputatuak lagunduta. Bi sail horiei eragingo die batik bat.
Orain arte bezala, gizarte zerbitzuak eskaintzen dituzten 327 zentroak ikuskatzen segituko dute. Baina orain zentro horietan dauden edo etxean zaintzen dituzten mendekoen arreta ere gertutik jarraituko dute. Adibidez, 15.000 mendekotasunerako laguntzak jasotzen dituzten bizkaitar zaintzen dituzte euren etxeetan: horietatik %15arengana joango dira urtero, zein egoeran dauen ikustera. Gizarte prestazioen ikuskapenak ere egingo dituzte, baina onuradun gehiagori eta zorrotzago.
Ikuskaritza hauek egiteko foru aldundiak bere baliabideak erabiliko ditu. Berrikuntzei aurre egiteko 600.000 euroko aurrekontua izango du planak.
