Ertzaintzak jakinarazi du ostiralean gertatu zela erasoa, Barakaldoko Erribera auzoan. Festa bat ospatzen bildu ziren hainbat lagun, eta Segurtasun Sailak azaldu duenez, bi bikote eta beste gizon bat elkartu ziren. Une jakin batean, albiste agentzien arabera, bikoteetako bateko gizonak bikotekidea jo zuen, eta hirugarren gizonak esku hartu zuen emakumea babesteko. Orduan, baina, beste bi gizonek erasotu zuten: batek ukabilkada bat eman zion, eta emakumea jo zuenak labankada bat eman zion lepoan. Erasotua ospitale batera eraman zuten eta larrialdiko ebakuntza bat egin behar izan zioten, jasandako zauri larrien ondorioz.
Ertzaintzak 25 eta 33 urteko bi gizonezko atxilotu zituen igandean Barakaldon, hilketa delitu baten saiakera egotzita. Zehaztu duenez, 33 urteko gizona egun bereko goizaldean ere atxilotu zuten, ustez emazteari eraso egiteagatik. Atxilotuak epailearengana eramango dituzte polizia izapideak bukatzean.
