50 urteko gizonezko bat hil zen, atzo, Santurtzin (Bizkaia), etxe batean izandako sutearen ondorioz. Sutea goizean piztu zen, Doctor Fleming kaleko etxebizitza batean, eta suhiltzaileak bertaratu zirenean, gizona lurrean etzanda aurkitu zuten, kea arnastuta. Etxetik atera zuten, baina hilda zegoen ordurako.
Sutea 06:40an sortu zen etxebizitzako gela batean, Ertzaintzaren lehen hipotesien arabera, gaizki itzalitako zigarrokin batek eraginda. Eraikinak bost solairu ditu, eta, sutearen ondorioz, 50 bat bizilagunek beren etxebizitzetatik atera behar izan zuten. Nolanahi ere, suteak ez zuen, hildakoaz aparte, beste zauriturik eragin, eta inork ez zuen osasun arretarik behar izan. 08:00etarako etxera itzuli ziren bizilagun gehienak, eraikinak kalterik ez zuela ziurtatu ondoren. Sutea piztu zen etxebizitza azpiko bizilagunek, ordea, ez zuten itzultzerik izan, sua itzaltzeko erabilitako ura igaro baitzen bertara.
Suhiltzaileek eta arkitektoek eraikina ikuskatu zuten atzo goizean, eta sutea piztu zen logelako sabaia ez erortzeko lanak egingo dituztela jakinarazi zuten. Eraikinaren egiturak, ordea, ez du kalterik jasan.
Santurtziko Udalak furgoneta bat egokitu zuen eraikinaren atarian, bizilagunek euren etxeetan jasan dituzten kalteen berri eman ahal izan dezaten eta aseguru etxeei kalte-ordainak eskatzen laguntzeko.
Gizon bat hil da Santurtzin, etxe batean izandako sutean
Iruzkinak
Ez dago iruzkinik
Ordenatu
