Gizonezko bat atxilotu dute Bilbon eta beste bi Gasteizen emakumeen kontrako indarkeria kasuengatik

Atzo goizeko 9:30ean deia jaso zuen Ertzaintzak Bilboko Santutxu auzoko Zabalbide kalean emakumezko bat jotzen ari zirela esanez. Ertzaintza harantz joan zenean buruan eta bularraldean kolpeak zituen emakumezko bat aurkitu zuten, hura anbulantzian erietxera bidali zuten, eta gizonezkoaren bila hasi. Gaueko hamarretan aurkitu zuten, etxean. Orain emakumezkoari besoetatik heldu zion gizonaren bila ari dira.

Emakumezkoak Ertzaintzari kontatu zionez, etxean eztabaidan hasi zen bikotea, eta gizonezkoa emakumezkoari jotzen hasi zen aterki batekin. Gizonezkoaren lagun bat etxean zegoen, eta hark emakumezkoari besoetatik heldu zion, erresistentzia egitea galaraziz.

Larunbatean bertan beste gizonezko bat atxilotu zuen Udaltzaingoak Gasteizen. Domingo Beltran kalean borroka bat zegoela esanez deia jaso zuen Udaltzaingoak goizean. Harantz iritsi zirenean gizonezko bat beste bati ostikoka eta muturrekoka ikusi zuten, eta haiek banandu zituzten. Ondoan emakumezko bat aurkitu zuten urduri, negarrez. Hark esan zien gizonezkoak bera jo zuela lehenengo eta hura babesten saiatu zen gaztea gero. Emakumezkoak esan zuenez, hozka egin zion aurpegian, eta gainera ez zen jotzen zuen lehen aldia.

Atzo ere atxilotu zuten gizonezko bat Gasteizen. 19:30ean jaso zuen deia Udaltzaingoak, gizonezko batek emakumezko bati hiltzeko mehatxua egin ziola esanez. Gizonezkoak bere autoarekin emakumezkoa zihoan autoaren kontra jo zuela ere esan zuen deia egin zuenak. Udaltzaingoa esandako tokira iritsi zenean, gizonezkoa alde egiten saiatu zen autoan, eta Udaltzaingoak atzetik jarraitu ondoren beste kale batean harrapatu zuen. Emakumezkoak esan zuenez, bere alabarekin eta auto gidariarekin zihoan autoari bidea oztopatzen saiatu zen bere senar ohia. Gidaria eta bera autotik atera eta senar ohiari azalpenak eskatzera joan zirenean hiltzeko mehatxua egin ziola dio.