Europan gehien erabiltzen den pestizida da glifosatoa, eta OME Osasunerako Mundu Erakundeak berak ohartarazi zuen iaz minbizia eragin dezakeela. Hala ere, eta datorren urte bukaeran Gai eta Substantzia Kimikoen Europako Agentziaren txostena jasotzen duten arte, haren erabilera beste hemezortzi hilabeterako berritzea onartu du Europako Batzordeak.
Batzordeak, hala ere, hiru baldintza proposatu ditu pestizidaren erabilerarako: hura landarean sartzea errazten duen talowamina gai kimikoaren erabilera debekatzea; uzta biltzerakoan egiten diren kontrolak zorroztea; eta pestizidaren erabilera mugatzea haur parkeak dauden inguruetan. Talde ekologisten iritziz, ordea, "eraginkortasun gutxikoak" dira neurriok.
Joan den apirilean Europako Legebiltzarrak proposatu zuen pestizidaren erabilera baimena gehienez ere zazpi urte luzatzea, eta ez hamabost, hasieran Batzordeak eskatu bezala. Azkenean, ordea, eta adituen txostenak dioenaren zain, datorren urte bukaera arte baimendu dute.
