Unibertsitate publikoarekin "konprometitutako" zazpi andre eta zazpi gizonek osatzen dute bere hautagaitza, Nekane Balluerka EHUko errektoregaiaren arabera. Goizean aurkeztu ditu bere zerrenda osatzen duten gainontzeko kideak. Balluerkarekin batera Iñaki Goirizelaiaren gobernuan egon diren Jon Zarate, Lore Bilbao eta Jose Luis Martin ere ageri dira izenen artean. Eta duela zortzi urte Marisol Estebanen hautagaitzan joandako Ivan Igartua izango da Arabako campuserako errektoreorde izateko hautagaia; Patxi Lopezen gobernuan Hezkuntza eta Unibertsitate Sailean egon ziren Esteban eta Igartua.
Balluerkak esan du unibertsitateko "sentsibilitate guztien isla" dela bere hautagaitza. Dena den, lehiakiderik izango ez duelako penatu da. Ideiak eta proposamenak eztabaidatu nahi ditu. Gainera, aitortu du hautagai bakarrarekin "zailagoa" dela botoa mobilizatzea.
Balluerkak datozen urteetarako helburu batzuk ipini ditu. Besteak beste, ikerketari bultzada bat eman nahi diola esan du. Proiektu nagusiena, hala ere, Medikuntza eta Erizaintza Fakultate berriaren obrak ordaintzeko finantzazioa lortzea eta lanekin hastea izango da.
