Ostiral arratsaldean zirudien argi zegoela, baina azken minutura arte tentsioa izan da Gasteizen. Gorka Urtaran izendatu dute alkate, baina ez bezperan zirudien bezain babes zabalarekin. EAJk ostiral arratsaldean jakinarazi zuen EH Bilduk gobernu aldaketaren alde egindako eskaintza onartu zuela, eta Gorka Urtaran jeltzalearen hautagaitza aurkeztuko zuela alkatea aukeratzkeo bilkuran.
10:18: Gaur, ordea, Andoaingo alkate aukeraketak giroa nahasi du EAJ eta PSEren artean. Andoainen EAJ PSE babestekoa zen, baina zinegotzi batek txuri bozkatu, eta EH Bildurentzat izan da alkatetza. PSEko kide ugari haserretu ditu horrek.
12:42: Udalbatza osatu baino ordu eta laurden lehenago jakin da albistea; Andoaingoa dela-eta, PSEko idazkari nagusi Idoia Mendiak jakinarazi du Gasteizko Udalean txuri bozkatuko dutela.
.@IdoiaMendia "el PSE-EE votará en blanco en #vitoria tras incumplir el PNV el acuerdo en Andoain" #13Jsozialistak#ColorPSOE
— Socialistas Vascos (@socialistavasco) June 13, 2015EAJk Gasteizen gehiengo osoa lortzeko, hamalau zinegotziren babesa behar zuen. Irabazik goizean iragarri du bere hautagaia babestuko duela. PSEren erabakiarekin, EAJk EH Bildu eta Hemen Gaude-ren babesa baino ez zukeen lortuko; guztira, hamahiru zinegotzi: gehiengo osorako baten faltan.
13:15: Egoera aldatuta, jokaleku berria aztertzeko berehalako bilera egin du Irabazik; bertan erabaki du atzera egin, eta Urtaran babestea. Osoko bilkura hasteko bi minutu falta zirela egin du erabakia publiko Oscar Fernandez Irabaziko zinegotziak.
Ante la nueva situación @IrabaziGasteiz votará a favor de Gorka Urtaran
— Oscar Fdez Martín (@oskar_fm) June 13, 201514:00etan izan da osoko bilkura, eta goizean zehar esandakoak bete dituzte alderdiek; PPko bederatzi zinegotziek Maroto babestu dute, eta EAJ, EH Bildu, Hemen Gaude eta Irabazi-k, berriz, Urtaran; hamalauk, guztira. Txuri bozkatu dute PSEko lau zinegotziek. Edurne Begiristain kazetariak zuzeneko kontakizuna egin du.
Alkate gisa eginiko lehen hitzaldian, hura babestu dutenei eskerrak eman dizkie Urtaranek, eta, bereziki, alderdikide ez dituenei. Adierazi du elkarbizitza berreskuratzea, krisia gainditzea eta hiria eraldatzea izango direla bere lehentasunak legealdian.
