Osteguneko Eskoziako independentzia galdeketa eta azaroaren 9ko Kataluniakoa gogoan izan ditu Gure Esku Dago-k Bilbon. Zelai Nikolas dinamikako ordezkariak eredugarritzat jo ditu bi herrialdeak, erabakiaren bueltan herritarrak batzeagatik: "Zer, noiz eta nola galdetu behar dioten euren buruari adostu dute Eskozian eta Katalunian". Europan "martxan" dagoen trenera igo nahi dutela berretsi du Nikolasek. Hitz gutxitan laburbildu du dinamikaren aldarria: "Herri bat, erabakitzeko eskubidea, herritarron garaia".
Bandera eskoziarrek, katalanek eta ikurrinek bat egin dute ekitaldian, Gure Esku Dago-ren globo urdinekin batera. Musika ere izan da; Ventura Feliu abeslari katalanak eta Kherau taldeak parte hartu du agerraldian, besteak beste.
Etorkizunari begiratzearekin batera, ekaineko giza katea ere gogoratu dute: "Ekainekoa hasiera besterik ez zen izan, jarrai dezagun bidean". Bideo bat osatu dute, giza kateko irudiekin.
[youtube]http://youtu.be/x1SmvoqxhKk[/youtube]
Batzar nagusia irailaren 27an egingo du dinamikak, bere bigarren urte politikorako "bide orria" eta antolaketa erabakitzeko.
