Gutxieneko pentsioak bermatzeko, 50 milioiko funtsa hitzeman dute

Gutxieneko pentsioak bermatu egin nahi ditu EAJk, eta horregatik, 50 milioi eurotako funtsa osatuko duela hitz eman zuen atzo Iñigo Urkullu lehendakarigaiak, Gasteizko hauteskunde ekitaldian. Zaharrek bizimodu duina izatea du helburu alderdi jeltzaleak, lehendakarigaiaren esanetan, eta bereziki pentsio txikiena dutenen eta alargunen egoerak kezkatzen ditu. «Gehiago bizi gara, baina duintasunez bizitzea bermatu behar dugu».

Gernikako Estatutuan jasotako eskumenak eskuratzeko xedearekin jarraitzen du Urkulluk, eta Gizarte Segurantzaren gestioa eskuratzeko eginahalak egingo dituela ohartarazi du. Gainera, PSE-EEren eta PPren kontra egin du eskumen hori eskuratuz gero pentsioak arriskuan egongo direla esanez «beldurra sartzen» ari direlako: «Euskaldunen pentsioentzat bermerik handiena haiek Euskadin kudeatzea da», esan zuen, «hemen kudeatzen dena askoz ere hobeto kudeatzen da».

Ekonomiaren kudeaketan gobernu «zorrotz eta eraginkorra» behar da Urkulluren irudiko. Industria politika berri bat defendatu du, enpresa babestuz, lehiakortasuna hobetuz, berrikuntzaren alde apustu eginaz, eta nazioartean zabaltzeko ahalegina eginez. «Lanpostuak galtzen ez jarraitzeko neurriak hartu behar ditugu, eta posible denean, lanpostuak sortzeari ekin behar diogu».

Gasteiz aurrera proiektua aurkeztu zuen Urkulluk Gasteizen atzo, Xabier Agirre Arabako zerrendaburuarekin batera egindako agerraldian.