Kanpainak urte osoa iraungo du, eta horretan Eusko Jaurlaritzak, Arabako, Bizkaiko eta Gipuzkoako Aldundiek, Bilboko, Donostiako eta Gasteizko Udalek, Eudelek eta EHUk hartuko dute parte. Dena dela, nabarmendu dute beste edozein erakundek parte hartu nahi badu horretarako aukera baduela.
Eusko Jaurlaritzako Bake eta Bizikidetza idazkari nagusi Jonan Fernandezek esan duenez, kanpainak hiru helburu izango ditu: giza eskubideak "herrialde proiektu" gisa aurkeztea, "pluralismoa eta adostasuna" sustatzea eta "giza eskubideen kultura" bultzatzea. Kanpainaren leloa Eskerrak giza eskubideei izango da.
Ekitaldi ugari antolatuko dituzte kanpaina hori dela-eta, eta erakundeok urtero egin ohi dituzten beste batzuk egitarau horretan sartuko dituzte. Besteak beste, diseinu grafikoari buruzko kongresu bat udaberrian, Giza Eskubideen Nazioarteko Kongresua udazkenean, hainbat jardunaldi eta ikastaro, Donostian Aieteko Baliabide Pedagogikoen Zentroaren inaugurazioa, musika mikrokontzertuak eta beste zenbait ekitaldi antolatuko dituzte. Ospakizunei amaiera emateko, abenduaren 10ean -Giza Eskubideen Nazioarteko Egunean, alegia- Rene Cassin saria emango du Eusko Jaurlaritzak.
