Zaballako espetxeko gaualdiari amaiera eman diote gaur eguerdian, hainbat eragile politiko, sindikal eta sozialekin batera egin duten elkarretaratzearekin. Herrira mugimenduak bultzatutako ekintza 35 gizarte eragiletako ordezkariren babesa izan du, hain zuzen.
Gaixotasun larriak dituzten 14 euskal presoak aska ditzatela eskatzeko, 200 lagun inguruk gaua pasatu dute kandelaren argipean Zaballako espetxean, Araban. Mikrofono irekia jarri eta elkartasun mezuak bidali dizkiote Zaballako espetxean aurkitzen den Txus Martin presoari. Basauritarra gaixotasun larriak dituzten 14 presoetako bat da.
"Eskubidez eta legez kanpoan egon behar lukete", adierazi du Ane Zelaia Herrira-ko kideak.
