Egunero atxikimenduak jasotzen ari dira M-18 Plazara ekinaldiaren bultzatzaileak, eta gaur sindikatuena jaso dute. Hego Euskal Herriko lau hiriburuetan egindako elkarretaratzeen bidez, LAB, EHNE, ESK, EILAS, HIRU, CNT eta Solidari sindikatuek bat egin dute datorren larunbatean Euskal Herriko 200 plazatara joateko egin duten deialdiarekin, Giza eskubideak. Irtenbidea. Bakea. Euskal presoak Euskal Herrira lelopean.
"Euskal presoen eta senideen giza eskubideen etengabeko urratzea" salatu dute deialdiarekin bat egin duten sindikatuek. Era berean, "afiliatuak" animatzen dituzte larunbatean, hilaren 18an, plazatan egingo diren mobilizazioetan parte hartzera. Horrez gainera, "lanean jarraituko" dutela jakinarazi dute, "salbuespen neurriak desager" daitezen.
