1990eko abenduaren 6an hasitako ibilbidea indarrez eten zuen Guardia Zibilak, 2003ko otsailaren 20ko gauez, Espainiako Auzitegi Nazionalaren aginduz. Xabier Alegria, Txema Auzmendi, Inma Gomila, Luis Goia, Fermin Lazkano, Xabier Oleaga, Martxelo Otamendi, Joan Mari Torrealdai, Iñaki Uria eta Pello Zubiria preso hartu, eta kioskoan zen euskarazko egunkari bakarra itxi zuten, ETArekin lotura zuelakoan. Zazpi urte geroago heldu zen auzipetuen absoluzioa.
Herritarren babes uholdea heldu zitzaien jada gehiago argitaratu ez zen egunkariari, egunkariko langileei, atxilotuei. 25 urte bete behar zituen iazko abenduan, baina mende laurdenera iristea galarazi zien Auzitegi Nazionaleko Del Olmo epaileak. Babes horri esker, ez zen guztiz eten haria, eta Egunkaria-ren lekukoari heldu zioten Egunero-k aurrena eta BERRIAk ondoren.
2014ko urrian auzi ekonomikoa artxibatuta, lasaitua hartu zuten auzipetuek. Erasoa ez ahazteko eskatu zuen Torrealdaik.
Inork ez du barkamenik eskatu.
