Hamaika Telebistaren seinalea Araban, Bizkaian eta Gipuzkoan ikus zitekeen orain arte. Gaurtik, ordea, mundu osoan ikus daiteke Interneteko zuzeneko emisioari esker. Haren webgunean sartu, eta pantailaren goialdean ezkerrean jartzen duen 'zuzeneko emisioa' zanpatuta, Hamaikak une horretan emititzen duena ikusten da.
"Saiakera batzuen ostean, gure kabuz montatu dugu hori ahalbideratzeko sistema. Zerbitzari bat jarri dugu Zamudion, Euskalteleko egoitzan, eta horren bidez egiten dugu Interneteko zuzeneko emisioa", azaldu du Nestor Urrestarazu Hamaikako informatikariak.
Hamaikaren webgunean, halaber, Bilboko egoitzan egiten dituzten hainbat programa ikus daiteke edozein unetan.
Hamaikak Interneteko sare sozialetan indarra jarri nahi du datozen hilabeteetan, "jendearen parte hartzerako bideratzeko. Facebookeko orrialdeak 1.370 jarraitzaile ditu eta 2.100 lagunetik gora.
Donostiako saioak ekainean
Orain arte Hamaika Bilbok ekoitzitako saioak baino ez daude ikusgai. Baina Hamaika Donostia martxan jartzen ari dira eta Donostialdean ekoitzitako programak ekaina amaieran emititzen hasiko dira.
Gasteizen ekoitzitako programak ikusteko, berriz, hilabete batzuk gehiago beharko dira.
BERRIAren Euskarazko Komunikazio Taldea (EKT) da Hamaikaren enpresako bazkideetakoa. Besteak, Elkar, Euskaltel, Noticias Taldearen CMN, Gara-ren EKHE eta Bainet dira.
komunikabideak
Hamaika TB gaurtik mundu osoan ikusteko aukera dago Internet bidez
Unean uneko emisioaz gain, Bilboko egoitzan egiten dituzten hainbat programa ere eskaintzen ditu zerbitzuak.
Iruzkinak
Ez dago iruzkinik
Ordenatu
