Abiadura handiko trenaren ibilbideko tunel bat egiten ari diren lekuan agertu zen zuloa. Duela hiru aste eman zieten herritarrei zuloaren berri, baina bost bat aste dira sortu zenetik. Iragan asteko euriteek lurra bustita, zuloa handitu egin da.
Ostegunean bilera bat egin zuten Adrian Tolosa zuloa agertu zen lurren jabeak, AHTko lanetako ordezkariek eta Igaro Balda Hernialdeko alkateak, Tolosaldeko Ataria-k argitaratu duenez. Bertan onartu zieten zuloa handitu egin dela eta arazoa nola konpondu aztertzen ari direla.
Eusko Jaurlaritzako Ingurumen eta Lurralde Sailak ohikotzat jo zuen AHTko lanetan eratutako zuloa. Azaldu zutenez, "tximinia" esaten diete halako lur erorketei, eta bestelako azpiegitura lanetan ere gertatu ohi dira antzekoak.
