Harrera elkartearen helburua "kartzelatik edo deserritik Euskal Herrira itzultzen diren gizon-emakumeentzako laguntza integrala lortzea" izanik, azken urteetako balantzea aurkeztuko dute batzar nagusian. Andoni Iturriotz Escudero elkarteko lehendakariak emango dio hasiera batzarrari, eta Sebastian Barinagarrementeria diruzainak 2015eko diru kontuen berri eman eta 2016ko aurrekontuak aurkeztuko ditu ondoren.
Eskualdeko eta herrietako egoeraren berri emango du Jon Ugartek, eta osasun alorrean zenbat pertsonari laguntza eman dieten ere azalduko du.
Arlo administratibo eta juridikoaren inguruko azalpenak Fernando Etxegaraik emango ditu, eta, azkenik, Karlos Ioldik lan eremuko informazioa azalduko du, azken urtebeteko emaitzak emanez eta arlo instituzionalean zein administratiboan egin dituzten urratsak xehatuz.
2.767 bazkide ditu —60 eurokoa da urteko kuota—. Aurten hamazazpi laguni aurkitu die lana, eta urte hauetan, ia ehuni. 2012ko ekainean sortu zuten Harrera.
