Inauteriak ospatzen ari dira egunotan hainbat lekutan, eta gaur hasi dute jaia Tolosan (Gipuzkoa), ostegun gizenez. Eguerdian bota dute txupinazoa, plaza zaharrean, eta ekitaldia zuzenean izan da ikusgai Tolosaldeko Hitza-ren webgunean.
Asteartera arte izango da herria festetan. Hainbat egitarau prestatu dituzte bost egunetarako, eta musika eta mozorroak izango dira nagusi. Edonola ere, eguraldiari dagokionez ez da giro izango Tolosan; euria iragarri du Euskalmetek gaurtik astelehenera arte gutxienez. Gaur ostarteak zabalduko dira tarteka, baina euria botako du. Asteburuan, berriz, tenperaturak gehiago jaitsiko dira larunbatean, baina gora egingo dute igandean. Astelehenerako, ostarterik ere ez du iragarri Euskalmetek: euria izango da nagusi.
Iturengoak eta Zubietakoak (Nafarroa) izan ziren inauteriak ospatzen lehenak. Urtarrilaren 28an, Zubietako joaldunak Iturenera joan ziren, inauteriei hasiera emateko. Hurrengo egunean, alderantzizko bidea egin zuten.
[Youtube]http://youtu.be/wD9R7wSYrXA[/Youtube]
Beste hainbat herritan ere ospatuko dituzte inauteriak. Datorren igandean, Lesaka eta Unanu (Nafarroa), Zalduondo (Araba), Mundaka eta Markina-Xemein (Bizkaia) eta Gamerera (Zuberoa) ailegatuko dira ospakizunak.
