Apirilaren 28an egin zuten lehen bilera. Hedabideek proposatu zuten aztertu beharko litzatekeela hedabideen kostuen gaia. Ildo horretan, oroitarazi zuten euskarazko komunikabideetako gabezia handienetako bat direla langileen lan baldintza "prekarioak", erdaraz lan egiten duten kazetarien alboan, nabarmen eskasagoak. Eta langile talde handia dira: Hekimenek ordezkatzen dituen komunikabideetako 600 lagun inguru daude egoera horretan. Lan baldintza horiek dagokien mailara igotzeko zein bide egon daitezkeen aztertzen ari da Hekimen, eta, besteak beste, atzerriko hainbat ereduri erreparatu die.
Oro har, hedabideen elkarteak garrantzitsutzat jo du bilera saila abiatu izana, argi baitu euskarazko hedabideen inguruan egiten diren inbertsio publikoak eraginkorragoak izateko ezinbestekoa dela lan eredu berri bat.
