“Haserre eta aspertuak” dira Batera plataformako kideak hirigune elkargo bakarraren kontrakoak egiten ari diren kanpainarekin. Bernard Cazeneuve Frantziako Barne ministroak lehen helegitea baztertzea erabaki ondotik, administrazio epaitegira jo dute, eta Pirinio Atlantikoetako prefetaren erabakia auzitara eraman. Helegitearekin batera, administrazio auzitegiak erabaki bat hartu arte hirigune elkargoaren sortze prozesua gelditzeko eskaera ere egin dute HELEParen kontrako hautetsiek.
Arazoa da helegitea jarri duten hautetsietako batzuek hirigune elkargoa 2017ko urtarrilaren 1ean martxan jartzeko sortu den gidaritza batzordean parte hartzen dutela. Batera plataformaren iritziz, egoera “onartezina” da. “Hautetsi batek ados ez izateko eskubidea du, baina demokraziaren printzipioak onartu behar ditu; gehiengo batek hirigune elkargo bakarra sortzearen alde egin du, baina hauek ez dute amore eman nahi”, salatu du Mixel Berhokoirigoin Batera-ko kideak.
Gidaritza batzordeko kideei sortu den egoerari “konponbide bat” eman diezaiotela eskatu die Batera-k. Hala, gutun bana idatzi die Jean Rene Etxegarai gidaritza batzordeko presidenteari eta gaur egun diren hamar herri elkargoetako presidenteei. Halaber, heldu den asteartean Departamentu Kontseiluaren Baionako ordezkaritza aitzinean elkarretaratzera deitu dute, 17:00etan.
