Manuel Valls Frantziako Barne ministroaren hitzek behin eta berriz erakutsi dute Frantziako Gobernuak ez duela lurralde elkargoa sortzeko borondaterik. Horrek eragin lezakeen hutsunea saiheste aldera doa Espagnacen proposamena, nahiz eta ez dituen betetzen Ipar Euskal Herriko lurralde elkargoaren aldeko gutxienekoak. Larunbatean milaka herritarrek ausardia eskatu zioten Hollanderi, elkargoaren eskaeraren aurrean "erantzun politikoa" emateko.
Espagnacen zuzenketa polo metropolitanoei dagokien atalean kokatzen da, 45. artikuluan. Gaur indarrean dagoen Pays egitura metropoli bihurtzea proposatzen du, gutxieneko aitortza instituzionala eskainiz Ipar Euskal Herriari. Egitura horren baitan leudeke Ipar Euskal Herrian dauden hamar herri elkargoak. Horrekin batera, Hautetsien Kontseiluak eta Garapen Kontseiluak osatuko lukete egitura.
Espagnacek nabarmendu du eskualdeak eta departamenduak bat egin dezaketela "Ipar Euska Herriaren antolaketa eta elkarlan" poloaren baitan.
Egitura onartuko balitz, honako arlo hauetan eragina ukan beharko lukeela dio zuzenketak: Antolaketa arloan etxebizitza arazoak gainditu eta ingurumena zaintzeko; tokiko garapena bermatzea, ekonomia, laborantza eta turismo arloetan bereziki. Gisa berean bermatuko luke euskal kulturaren eta euskararen garapena; Ipar Euskal Herriaren aitortza, garapena bermatuz eta onartuz dituen berezitasunak.
Maiatzaren 24an aurkeztu zuen zuzenketa, lurralde elkargoaren aldeko manifestazioa egin baino astebete lehenago.
