Herrira mugimenduak balorazio baikorra egin du larunbatean euskal preso politikoen eskubideen alde antolatu zuen Goazen Plazara ekinaldiaren inguruan. Mugimenduaren datuen arabera, 30.000 lagunek Euskal Herriko 250 plaza baino gehiago bete zituzten; ekinaldia, ordea, ez zen Euskal Herrira mugatu: Katalunian, Londresen eta Argentinan ere "ehunka" lagun irten ziren kalera, presoen eskubideak aldarrikatzeko.
Atzo lehen balorazioa egin ondoren, beste azterketa bat plazaratu du gaur Herrira-k, Gasteizen goizean emandako prentsaurrekoan. Juan Ibarrondok, Itziar Rekaldek, Manu Ugartemendiak eta Nagore Garciak parte hartu dute.
"Jendetza honen ahalegin kolektiboak, eta ekimen honetara batu den gehiengo sindikalak, politikagintzaren esparru aski zabal eta pluralak, mota guztietako elkarte eta eragileek ere nabarmen uzten dute presoen eskubideak errespetatzea eta kartzela politika bake prozesuari egokituz aldatzea eskari bat dela, gehiengo zabalak bere egiten duena", azaldu du Garciak. "Gobernuan jarriak direla begirada horiek guztiak, pauso baikorrak eman ditzan".
Herrira-k ekinaldian parte hartu zutenei eskerrak eman dizkie, eta gauzak alda daitezen "indarrak batzea" ezinbestekotzat jo du.
Herriz herri balorazio bat egin ahal izateko, galdetegi bat prestatu dute, guztien iritziak jasotzeko asmoz.
