San Telmoko adierazpenaren sinatzaileek Herritarren Topaketa antolatu dute Mondragon Unibertsitateko HUHEZIn, Eskoriatzan (Gipuzkoa). Hamar lantalde desberdinetan banatu dira parte hartzaile guztiak, osatu nahi den herritarren sarearen inguruko ezaugarritzea lantzeko.
Lantalde desberdinetan sare horrek izan beharreko izaera, mezua eta lan estiloa eztabaidatu dituzte gune desberdinetan. Datozen egunetan eztabaiden ondorioak plazaratuko dituzte.
Amaieran, adierazpenak egin dituzte Teresa Toda eta Joseba Azkarraga adierazpenaren sinatzaileek: "Euskal preso eta iheslarien eskubideen defentsan lan egingo duen sarea osatze bidean, herritarren protagonismoa lehenestera goaz. Horretarako, eztabaidarako guneen beharra eta balioa azpimarratu nahi dugu. Herritar bakoitzak egin dezakeen aportazioa ezinbestekoa izango da hemendik aurrera eta guztiei bide ematea dagokigu".
