Azpeitian (Gipuzkoa) egin dute aurten ikastolek ikasturteari hasiera emateko ekitaldia, gaur goizean. Bertan izan da, besteak beste, Eusko Jaurlaritzako Hezkuntza sailburua, Cristina Uriarte. Eta hari zuzenean zuzendu zaio Koldo Tellitu hainbat gairen harira. Hezkuntza legearen inguruko urratsak "indar" handiagoz egiteko eskatu dion heinean, "baliabide mailan" aurrera urratsak eskatu dizkio, eta "aitortza", egun sentitzen dutena baino irmoagoa: "Gure espektatibak ez dira ari betetzen". Espainiatik ezarritako LOMCE hezkuntzaren erreformari aurre egiteko nahia ere berretsi du ikastolen ordezkariak: "Hura erabat indargabetu arte".
Hezkuntza legea lantzen joateko prozesua abiatzear dagoela esan du Uriarte sailburuak: "Eragileekin hitz egingo dugu". Adostasunerako bidean eragozpenak izango direla iragarri du: "Ez da erraza izango". Baina lanerako borondate irmoa erakutsi du: "Aurrera egingo dugu inposaketarik gabe".
Hezkuntza eredu propioaren aldarrikapena egiteko baliatu dute ikastolek gaurko ekitaldia, eta, horren harira, publifikazio garaian ikastolen izaera berezkoaren aldeko hautua egin zuten lau ikastetxe omendu dituzte. Bi Gipuzkoakoak dira: Ikasberri (Azpeitia) eta Andramendi (Beasain). Eta Bizkaikoak: Txintxirri (Elorrio) eta Betiko (Leioa).
