Ikasturte hasierako ekitaldia egin dute Eusko Jaurlaritzako ordezkariek Donostian, Amara Berri ikastetxean. Ikasgelak bisitatu ditu Cristina Uriarte Hezkuntza sailburuak, eta datuak eman ditu.
Matrikulazioetan igoeratxo bat dago aurten, %0,2koa. Denera 370.000 ikasle izango dira. Lanbide Heziketa salbuespena da: krisi garaian, langabezia igo denean, igo egin dira matrikulak hor; orain, egoera ekonomikoa hobetu denean, zerbait jaitsi dira, %1,8.
Hizkuntz ereduetan ere berritasun gutxi dago: D ereduak aurrerantz jarraitzen du, eta A eredua gero eta bazterrekoagoa da. Ahulgunea, beste behin, Lanbide Heziketan du euskarazko ereduak.
Iragarpen nagusia Heziberri planari lotuta egin du sailburuak: Hezkuntza Legea egiteko bilerak hasiko ditu. Hezkuntzako eragileekin, sindikatuekin eta alderdi politikoekin bilduko da. Irailean bertan hasiko da.
Bileretara ez du dokumenturik eramango gobernuak. "Entzutera" doa. Horren ondoren, bai, asmoa du dokumentu bat proposatzeko. Prozesu luzea izango da, hala ere. Uriartek ohartarazi du legealdi honetan ez dutela legea onartuko.
