Gaur zuten aztertzekoa Alberto Plazaolaren aurkako euroagindua, Pauen (Okzitania), baina auzia gibelatu egin dute, prozedura akats batengatik. Xantiana Cachenaut abokatuak azaldu duenez, Fernando Grande-Marlaska epaileak gazteleraz soilik igorri du euroagindu eskaera Pauera. Frantsesez bidaltzea beharrezkoa zen, ordea. Gainera, euroaginduek ez dute balio 1993 aitzinetik gertaturiko kasuetarako, eta Plazaolari 1987ko kasu bat egozten diote.
Irailaren 29an eginen dute berriro Plazaolaren aurkako auzia, Pauen, eta bitartean beharrezko dokumentuak bidaltzeko eskatu dio prokuradoreak Espainiako Auzitegi Nazionalari. Plazaola espainiaratu ahal izateko, estradizio eskaera bat bideratu beharko luke Madrilek, eta dokumentuak frantsesera itzulita igorri. Bigarren auzia iragaten den bitartean kontrol judizialpean jarraitu beharko du Plazaolak.
Irailaren 7an atxilotu zuten Oñatiko preso ohia, Ziburun (Lapurdi), eta biharamunean aske utzi zuten, kontrol judizialpean. Frantziako espetxeetan betetako urteak Espainiako zigorrari kentzeagatik aske utzi zuten Plazaola 2014ko abenduan, Santiago Arrospiderekin batera. Martxoan hura atxilotzera joan zen Guardia Zibila, baina ez zuten etxean atzeman, eta ordutik bizi zen Ziburun.
