Hilero bezala, Etxerat-ek euskal presoen eta haien senideen egoera salatu du

Hileko azken ostiral guztien gisan, atzo ehunka lagun atera ziren kalera Euskal Herriko herri eta hirietan, euskal presoen eskubideen alde. Urrian izandako atxiloketak eta tortura salaketak ekarri zituzten gogora, eta Porturen eta Sarasolaren aurkako torturen epaiketan haien senide eta lagunek jasandako kolpeak ere aipatu zituzten. Ez zuten preso bati bisita egitera zihoan lagun baten azken istripua ahaztu: urteko hamargarrena. Horrekin guztiarekin, «krudelkeria oinarri duen espetxe politika hau amaitzeko» deia egin zuen Etxerat-ek, «euskal preso politikoen eskubideak behingoz errespetatuak izan daitezen».Besteak beste, Getarian 33 lagun elkartu ziren, Arrigorriagan 48, Azpeitian 110, Bilbon 400, Irunen 60, Usurbilen 57, Urretxu-Zumarragan 100, Arrasaten 300 eta Zaldibian 75.