Sorospen zerbitzuek hilik aurkitu dute astearte arratsaldean San Adrianen (Nafarroa), Ega ibaiko urtegian, urak eraman zuen gaztearen gorpua. Desagertu zen lekutik gertu aurkitu dute hiru eguneko aurkitze lanen ondoren. 15 urte zituen, eta Calahorrakoa zen (Errioxa, Espainia). Lekuko batek jakinarazi duenez, harri batean irrist egin eta hiru metroko sakonera duen putzu batera erori zen.
Gazteak ez zekien igerian, eta urak ibaian behera eraman zuen. Lagunak hura laguntzera joan baziren ere, horiek ere urak eraman zituen, eta ezin izan zuten gaztea atera. 17:00etan jaso zuen deia Guardia Zibilak, eta berehala hasi ziren urpekariak eta suhiltzaileak bila. Iluntzean, ordea, gaztea aurkitzeko lanak bertan behera utzi zituzten.
