Hiru adingabe auzipetu dituzte eskola kide baten aurkako jazarpenagatik

Donostiako ikastetxe bateko 14 urteko hiru ikasle auzipetu dituzte, ustez eskolako bertze kide baten aurka jazartzeagatik. Fiskaltzak 70 orduko gizarte lanak eskatu ditu hiru gazteentzat, edo zazpi asteburu zentro batean igarotzea, lehendabiziko neurria haien borondatez onartuko ez balute. Kalte-ordaina eskatu du, gainera, biktimarentzat; ustezko erasotzaileak harengana ez hurbiltzeko, eta harekin harremanetan ez jartzeko ere eskatu du. Bertze hiru ikasle, 14 urtetik behitikoak direlako, ez dituzte auzipetu. Fiskaltzaren arabera, 2011ko azken hiruhilabetekoan eta 2012ko lehendabizikoan, ikasle bat iraindu eta jo dute, «ia egunero». Ondorioz, antsietateak eta estresak jota dago gazte hori.